ABB İnnovasiya İslam İnkişaf Bankının mükafatına layiq görüldü

İslam İnkişaf Bankı Azərbaycan ekosistemində yenilikçi maliyyə həllərinin yaradılmasında, müasir dövrün qlobal tələblərinə uyğun hakatonların təşkilində aktiv iştirakına görə ABB İnnovasiyanı mükafatlandırıb.

Mükafatlandırma İslam İnkişaf Bankı Qrupunun Bakıda keçirilmiş İllik Toplantılarından sonra, bu tədbirin davamı kimi həyata keçirilib.

Qeyd edək ki, toplantılar zamanı iyunda Bakıda “5-ci IsDB Startap və İnnovasiya Müsabiqəsi” də təşkil olunub. Müsabiqə İslam Əməkdaşlıq Təşkilatı bazarlarında innovasiya, süni intellekt, maliyyə, ticarət və sahibkarlığın gücləndirilməsi mövzusuna həsr edilib.

Müsabiqə İslam Əməkdaşlıq Təşkilatına üzv ölkələrdən sahibkarları, innovatorları, investorları bir araya gətirib. İştirakçılar əsas inkişaf çağırışlarının həllinə yönəlmiş innovativ həllər təqdim ediblər. Müsabiqəyə süni intellekt, aqrar texnologiyalar, ərzaq təhlükəsizliyi, fintek, kibertəhlükəsizlik, dayanıqlılıq, iqlim, təchizat zənciri, ağıllı şəhərlər, insan inkişafı və səhiyyə istiqamətləri üzrə 220-dən çox startap müraciət edib. Birinci yerin qalibi BIOSHELL startapı olub.

ABB İnnovasiyanın fəaliyyəti, həyata keçirdiyi layihələr, proqramlar və təqdim etdiyi imkanlar barədə ətraflı məlumatı rəsmi internet səhifəsindən və sosial şəbəkə hesablarından əldə etmək mümkündür.